Prokuroria e Tiranës vendos ndarjen në dy dosje të hetimeve të nisura për vdekjen e 17vjeçarit Ardit Gjoklaj në landfillin e Sharrës, më 7 gusht 2016.
Dosja penale për vdekjen e të riut që punonte ilegalisht në landfillin e mbeturinave, pritet të shkojë në Gjykatë së shpejti me disa persona të akuzuar për humbjen e jetës së të riut. Ndërkohë Prokuroria e kryeqytetit do të mbajë në hetim një dosje të dytë, e cila është veçuar tashmë dhe që ka të bëjë me kontratën mes Bashkisë së Tiranës dhe kompanisë që ka marrë të drejtën e përpunimit të mbeturinave në lanfdillin e Sharrës. Ndarja e dosjes në dy pjesë, sipas Prokurorisë, është bërë pasi akuza për vdekjen e Ardit Gjoklajt, më 7 gusht 2016, brenda në landfill, konsiderohet e provuar. Nga ana tjetër, hetimi për kontratën mes Bashkisë së Tiranës dhe kompanisë “3R”, e cila përpunon mbeturinat në Sharrë, sipas burimeve nga organi i akuzës, ka nevojë për veprime të tjera shtesë. Për këtë arsye, sipas Prokurorisë, është vendosur që dosja për vdekjen e Ardit Gjoklajt të ndahet dhe të dërgohet në Gjykatë, duke qenë se akuza konsiderohet e provuar.
TË AKUZUARIT Më datë 7 gusht 2016, ora 23:00, Policia ka njoftuar se u arrestuan në flagrancë shtetasit Besnik Braha, 53 vjeç, banues në Tiranë, me detyrë përgjegjës firme, Edmond Kollari, 40 vjeç, banues në Tiranë, drejtues ekskavatori, Dëfrim Hakrama, 44 vjeç, banues në Tiranë, përgjegjës turni në landfillin e Sharrës, dhe Bujar Daja, 45 vjeç, banues në Kavajë, përgjegjës i punonjësve në landfillin e Sharrës.
Për shkak se nuk është gjetur në Tiranë, është shpallur në kërkim Edurim Teqja, 48 vjeç, banues në Peqin, administrator i firmës “3R SH.P.K”. Siç bëri me dije Policia, arrestimi i tyre u bë sepse në orën 14:30, te landfilli i Sharrës, në grumbullin e mbeturinave, është gjetur kufoma e shtetasit Ardit Gjoklaj, 17 vjeç, banues në Kombinat, i cili ishte punonjës sezonal në landfill, i paregjistruar te firma “3R SH.P.K”. Sipas hetimeve të Prokurorisë, viktima është aksidentuar për vdekje nga një mjet tip ekskavator me kova gjatë punës në landfill. Aksidenti ka ndodhur mes orës 05:00 deri në orën 05:40, kohë kur, sipas hetimeve të kryera nga ana e Prokurorisë, ka rezultuar se ekskavatori me kova ka punuar në zonën ku ishte lënë të punonte viktima Ardit Gjoklaj. PROVAT E PROKURORISË Më shumë se 32 dëshmitarë janë pyetur nga Prokuroria në dosjen e hetimit për vdekjen e Ardit Gjoklajt. Dëshmi u janë marrë edhe katër të arrestuarve, disa prej të cilëve u liruan më pas nga Gjykata. Ata mohuan se viktima punonte në Sharrë dhe pretenduan se trupi i tij ishte sjellë nga Tirana me kamion ët e plehrave. Por Prokuroria ka siguruar dëshmitë e rojeve të landfillit që kanë pohuar se Ardit Gjoklaj në kohën kur vdiq kishte dy muaj që lejohej të hynte në landfill, pasi punonte aty në të zezë. Po kështu, Prokuroria ka marrë në pyetje edhe disa kolegë të 17 vjeçarit, që kanë pohuar se atë natë, pas orës 23:00, Ardit Gjoklaj ka qenë në rreshtimin që u është bërë punëtorëve, ku edhe u janë ndarë detyrat që do të kryenin. Një tjetër provë e Prokurorisë është autopsia e viktimës, që tregon se vdekja ka ardhur nga dëmtimi me ekskavator në pjesën e kokës, gjymtyrëve dhe pjesën e sipërme të trupit. Prova e radhës, e siguruar nga Prokuroria, ka qenë vendndodhja e Ardit Gjoklajt, e gjetur përmes lokalizimit të telefonit të tij celular në ditën e ngjarjes. Sipas kësaj vendndodhjeje, telefoni i Gjoklajt është loguar në rrjet natën e krimit nga antena më e afërt me landfillin e Sharrës.
