Gjyqtari i Beratit Shyqyri Çobo, i cili ngacmoi seksualisht një grua duke i kërkuar favore seksuale në këmbim të ndihmës për një çështje është dënuar me 2 vite burg nga Gjykata e Krimeve të Rënda.
Por, dënimi i tij është konvertuar nga Gjykata në shërbim prove prej 18 muaj dhe i është hequr e drejta për të ushtruar funksionin për 5 vite.
Gjyqtari i Beratit Shyqyri Çobo, tashmë i pezulluar nga detyra, i ka dërguar 170 mesazhe gruas, e cila e denoncoi për ngacmim seksual. Në një periudhë prej 3 muajsh, që nga seanca e parë e gjyqit ndaj gruas 32-vjeçare në Gjykatën e Beratit, Prokuroria ka thënë se Shyqyri Çobo e ka ngacmuar me anë të mbi 300 telefonatave dhe 170 mesazheve të shkruara.
Disa prej telefonatave janë regjistruar nga 32 vjeçarja, e cila ua dorëzoi ato hetuesve në momentin që bëri denoncimin. Ndërsa mesazhet janë gjetur të gjitha në telefonin e saj, që është këqyrur nga hetuesit e Krimeve të Rënda. Bashkë me zbardhjen e mesazheve të dërguara në adresë të 32 vjeçares, hetuesit kanë konfirmuar edhe numrin dërgues të teksteve.
