Publikimi i një video ku shfaqet djali dhe nipi i Klement Balilit, në shoqërinë edhe të personave të tjerë, teksa thyejnë me leva portën e një biznesi në Sarandë ka sjellë edhe reagimin e menjëhershëm të familjes Balili.
Në një prononcim për “BalkanWeb”, familja Balili pretendon se biznesi për të cilin bëhet fjalë është i marrë me qera prej tyre dhe se shkallmimi i derës me levë është bërë për shkak se nuk dispononin çelësat e objektit. “Ai është biznesi ynë, më saktë një biznes i marrë me qera dhe ne i japim edhe një kopje të kontratës së qerasë. Ne kishim harruar çelësat dhe gjithçka nisi si lojë. Video që qarkullon po përdoret politikisht për shkak të Klement Balilit”, – janë shprehur familjarët.
Por referuar një tjetër dokumenti të “citynews.al” mësohet se pronari i këtij biznesi, Timoleon Babi në datën 6 janar 2017 ka bërë një kallëzim penal në prokurorinë e Sarandës ku akuzon familjarët e Klement Balilit për dhunim të biznesit të tij. Gjithashtu mësohet se biznesmeni Babi e ka revokuar kontratën e qerasë që në 29 shtator 2016, ç’ka do të thotë se tashmë familjarët e Balilit nuk kanë më të drejtë të ushtrojë aktivitetin e tyre në pronën e tij. Mësohet se pikërisht revokimi i kontratës së qerasë të ketë qenë edhe arsyeja pse familjarët e Balilit e shpërthyen me levë derën e biznesit të Timoleon Babit.
