Deklarata e përbashkët e partive shqiptare në Maqedoni është përshëndetur nga ish-kryeministri Sali Berisha, nëpërmjet një postimi në faqen e tij në rrjetin social “Facebook”. Ai e cilëson marrëveshjen e partive shqiptare një arritje për shqiptarët dhe Maqedoninë, nëse zbatohet.
Postimi i ish-kryeministrit Berisha:
“Një deklaratë për t’u përshëndetur!
Të dashur miq, forcat politike shqiptare në Maqedoni, në një akt të lartë përgjegjësie para elektoratit tyre por edhe kombit shqiptar, miratuan një deklaratë të përbashkët, në të cilën zotohen të përdorin fuqinë e mandateve të tyre kundër diskriminimit dhe për garantimin e lirive dhe të drejtave të shqiptarëve në Maqedoni.
Ato angazhohen për të mbështetur ndryshime ligjore dhe kushtetuese për barazinë e etnive në Maqedoninë multietnike si dhe të japin kontributin e tyre për stabilitetin, integrimin europian dhe euroatllantik të Maqedonisë. Zbatimi i kësaj marreveshje do të ishte një arritje historike për shqiptarët por edhe vet Maqedoninë multietnike! Sb”
