Kreu i Partisë Demokratike Lulzim Basha ishte në një takim të organizuar me rastin e 26 vjetorit të themelimit të gazetës “Rilindja Demokratike”, ku morën pjesë edhe personalitete të selisë blu si dhe përfaqësues të medias.
Në fjalën e tij përshëndetëse, kreu i demokratëve, theksoi se PD do të jetë gjithmonë e hapur me mediat në vend në funksion të së vërtetës.
Por Basha nuk ngurroi të akuzonte edhe qeverinë për situatën e rendit, ndërsa i bëri thirrje mediave të ndihmojnë për të pasur zgjedhje sa më të lira dhe të ndershme.
“Nuk e pengon vettingu kapjen e bosëve të drogës por qeveria. Kudo ku lartësohen ndërtime pa leje në mënyrë kriminale është krimi në pushtet. Nuk ka dy të vërteta për rrogat dhe pensionet, ka vetëm 1 nuk janë rritur. Negociatat nuk hapen sepse nuk janë përmbushur standartet dhe sepse kjo qeveri nuk ka siguri që mund të organizojë zgjedhjet lira. Dua t’u bëj thirrje mediave të bashkohemi sot për zgjedhje të lira e të ndershme. Të Luftojmë së bashku për të zhdukur shitblerjen e votës. Dua ta pohoj para jush se si opozitë prej të vërtetës ekzistojmë dhe prej saj do të fitojmë. Do jem kurdoherë i hapur dhe bashkëpunues me mediat”, u shpreh Basha.
