Dyshja Renato Mekolli dhe Laura Nezha spikatën gjatë gjithë spektaklit ‘Dance with Me’ me lëvizjet e tyre në skenë si balerinë profesionistë, prandaj për shumëkënd nuk ishte aspak e habitshme që të dy rrëmbyen kupën në fund të edicionit të tretë. Por në një intervistë për ‘Panorama’, shefi i njohur i kuzhinës ka pranuar se nuk ka patur një marrëdhënie fort të mirë me producenten Vera Grabocka. Në media është shkruar për një zënkë mes të dyve, gjë që vetë Mekolli e ka pohuar.
“Po, është e vërtetë që marrëdhënia ime me Verën ishte e ftohtë për një kohë të gjatë. Por kjo nuk do të thotë që unë nuk kam respekt të madh për të, që e vlerësoj në maksimum për ato që ka dhënë në televizion. Ajo është një yll në televizion dhe shumë profesioniste. Kemi pasur konflikte, por jemi të dy karaktere të forta; dhe çfarë i kemi thënë njëri-tjetrit, ia kemi thënë hapur. Kjo marrëdhënie sigurisht që është shumë e fortë këtë moment dhe e duam shumë njëri-tjetrin.”-u shpreh ai.
Ndërkohë që vetë Renato nuk ka dhënë asnjë arsye konkrete pse janë konfliktuar, i ka quajtur konfliktet diçka normale brenda familjes.
“Për gjëra që kishin të bëjnë me brenda familjes. Shpeshherë, edhe unë kam reaguar për gjëra që nuk më preknin personalisht, si dhe për diskutime që kanë të bëjnë me mua dhe me produksionin.” Gjatë këtij edicioni të “Dance with Me” është përfolur dhe për një sherr mes Vera Grabockës dhe Fjolla Morinës, madje në media u shkruajt se konflikti kishte degjeneruar në dhunë fizike, bazuar në informacione të siguruara nga burime brenda produksionit, duke përmendur këtu emrin e Renatos. Kjo mund të ketë qenë arsyeja e ftohjes mes të dyve.
Mekolli theksoi se e admiron mënyrën si punon Grabocka, si dhe i jep të drejtë që është e prerë.
“Edhe unë i rreptë jam me punën time. Nëse ke të bësh me një staf gjigant, duhet të jetë dhe një shef që drejton skuadrën. Por ndonjëherë, pa dashje, kalohen limitet,”- përfundoi Mekolli.
