Kanë pritur deri në ditët e fundit të vitit që të përfitojnë investime por pasi ato nuk kanë ardhur, ata kanë zgjedhur të protestojnë.
Këta janë banorët e fshatit Hamil, njësia administrative Ndërmenas, në Fier, të cilët ditën e sotme kanë protestuar kundër gazjellësit TAP pasi këta të fundit nuk i janë përmbajtur premtimeve.
Sipas banorëve, që kanë bllokuar rrugën kryesore që të con në këtë fshat, edhe pse nga ana e firmës ishte premtuar se dëmet e shkaktuara nga mjetet e tonazhit të rëndë, do të riparoheshin brenda vitit, kjo gjë nuk ka ndodhur.
Ata kanë kërkuar asfaltimin e rrugës kryesore si dhe investime të tjera në zonën ku jetojnë. Prej kohësh në këtë zonë vijojnë punimet për shtrimin e linjës së gazjellësit TAP, i cili ka dëmtuar rrugët hyrëse dhe dalëse, duke i lënë banorët në mëshirë të fatit.
