Kësaj rradhe kryeministri i vendit Edi Rama nuk ka shpërndarë leje legalizimi live para kamerave e me regji qëndrore, ku e ka bërë zakon të shkëmbejë edhe batuta me qytetarët.
Ai ka preferuar të japë një tjetër shfaqje, që me sa duket do të vazhdojë edhe në zona të tjera të Shqipërisë.
Është fjala për dhënien e dëmshpërblimeve për banorët e zonave të përmbytura.
Sot Rama ishte në Krujë, bashkë me ministrin Tahiri dhe kryebashkiakun e qytetit, Artur Bushi, në një event të organizuar enkas për dhënien e dëmshpërblimeve për banorët e përmbytur.
Skenari është i njëjtë, pas fjalës së vet kryeministri fton qytetarët sipas emrit në listë, u jep çekun ku është shënuar shuma e parave që i takon dhe më pas bën batuta.
E gjithë shfaqja transmetohet live në televizion. Ndonëse jemi disa muaj para, motorët e fushatës janë ndezur dhe kryeministrit i duhet më shumë vizibilitet dhe hapësirë për t’u shfajësuar me dështimet qeverisëse.
Kështu ndodhi edhe sot, ku para banorëve të Krujës ndër të tjera u shpreh: “Ç’thotë ky mo, del vetëm në televizor dhe s’ka bërë asgjë. Në fakt është e vërtetë, ka shumë njerëz që s’kanë parë asgjë akoma”.
