Besnik Hasi mund të drejtojë sërish një ekip në Belgjikë dhe të rikthehet sërisht në kampionatin Jupiler League. Ish-kapiteni i Kombëtares është kandidati kryesor për të marrë Genk sipas mediave belge. Rezultatet në kampionat të këtij ekipi, që ndodhet në vendin e nëntë, po rrezikojnë stolin e Peter Maes dhe një rezultat negativ në takimin e së martës në kampionat me Gent mund ta largojë atë.
Një lëvizje e tillë do t’i hapte rrugën Besnik Hasit, i cili nuk drejton prej shtatorit, pasi u shkarkua nga drejtuesit e Legia Varshavës. 44-vjeçari e njeh mirë futbollin në Belgjikë, ku kaloi pjesën më të madhe të karrierës si futbollist dhe nisi atë si trajner me Anderlecht. Genk është një mundësi e mirë për Besnik Hasin, pasi skuadra është ende në garë në Kupën e Belgjkinës dhe në Europa League ku në fazën me eliminim direkt do të përballet me Astra Giurgiu.
