Shërbimi për Çështjet e Brendshme dhe Ankesat në Ministrinë e Brendshme ka arrestuar 2 punonjësit e policisë, pas arratisjes spektakolare të 21-vjeçarit Edison Pula nga Stacioni i policisë në Fushë-Krujë. Ata akuzohen se kanë neglizhuar gjatë detyrës e për pasojë u largua një i ndaluar nga Komisariati.
Shërbimi i Çështjeve të Brendshme dhe Ankesave ka arrestuar në flagrancë dy punonjës të policisë së Komisariatit Krujë, për shkak të dyshimeve se kanë neglizhuar në kryerjen e detyrës gjatë shoqërimit të të ndaluarit Edison Pula në ambjentet e paraburgimit.
Ngjarja në fjalë ka ndodhur gjatë orëve të mbrëmjes së djeshme, kur shtetasi i ndaluar ka mundur të largohet nga ambjentet e Komisariatit të Fushë Krujës.
Sot në mesditë strukturat e SHÇBA-së Durrës arrestuan dy punonjësit e Policisë me detyrë Patrullë e Përgjithshme pranë Komisariatit Krujë:
– Denis Çela, 22 vjeç
– Naim Stafuka, 39 vjeç, të akuzuar për veprën penale të “Shpërdorimit të detyrës”.
Gjithashtu SHÇBA po heton në gjendje të lirë oficerin e Patrullës së Përgjithshme G.T..
Materialet procedurale i kaluan për ndjekje Prokurorisë së Rrethit Gjyqësor Krujë
