Shtetet e Bashkuara dhe Kanadaja kanë thënë se do t’i ndalin shpimet e naftës dhe të gazit në pjesën më të madhe të bregdetit të tyre në Arktik. Presidenti në ikje, Barak Obama ka marrë një vendim mjaft të rëndësishëm, i cili sipas ligjeve në fuqi nuk mund të kthehet nga pasardhësi i tij.
Kështu, Obama ka pezulluar çdo shpim për ngritje impiantesh të nxjerrjes së naftës dhe gazit natyror në Oqeanin Atlantik dhe në Arktik të SHBA-ve.
Për këtë vendim, Obama ka përdorur ligjin shumëpak të njohur “Akti i Shelfit të Jashtëm Kontinental”. Sipas vendimit, të gjitha hapësirat detare të SHBA-ve në Arktik dhe Oqeanin Atlantik nuk do të përdoren për shpime dhe ndërtim të rafinerive të nxjerrjes së naftës dhe gazit natyror.
Kjo do të thotë, që SHBA-të do të varen nga nafta e Lindjes së Mesme edhe më shumë për nevojat e brendshme. Kjo lëvizje qartas konsiderohet parandalim i zhvillimeve në rajon, nga presidenti i zgjedhur amerikan, Donald Trump i cili nuk mund ta kthejë vendimin.
