Policia ka reaguar për arratisjen e 21-vjeçarit Edison Pula të vënë në pranga gjatë ditës së sotme si pjesë e një grupi kriminal.
Sipas Policisë, vetëm 9 orë pas arrestimit 21-vjeçari, duke përfituar nga pakujdesia e dy policëve në momentin e transferimit nga Stacioni i Policisë Fushë-Krujë në Komisariatin e Krujës ka kapërcyer murin rrethues dhe është larguar.
Pula ishte ndaluar sot në kuadër të operacionit “Shënjestra” ku u arrestuan në flagrancë dy persona, u ndaluan 7 të tjerë, ndërkohë që u shpall në kërkim një tjetër.
Policia ka rrethuar dhe po kreh të gjithë zonën përreth me qëllim kapjen e të arratisurit.
Ndërkohë, mësohet se Shërbimi për Çështjet e Brendshme dhe Ankesat po verifikon shkeljen e rregullave të Shërbimit nga Punonjësit e Policisë që kanë qenë me detyrë për shoqërimin e Edison Pulës.
