Partia Demokratike akuzon Kryeministrin Edi Rama se po pengon me çdo mjet Komisonin Hetimor Parlamentar për CEZ.
Në mbledhjen e sotme të këtij komisioni duhej të dëshmonte sërish ministri i Energjetikës Damian Gjiknuri, por nuk u paraqit. Gjithashtu, as deputetët e mazhorancës pjesë e këtij komisioni bojkotuan mbledhjen e sotme.
“Edi Rama ka bojkotuar sot Komisionin Hetimor Parlamentar për marrëveshjen e tij me CEZ, që i kushtoi vendit 470 milionë euro. Edi Rama po shfrytëzon të gjithë pushtetin që ka në dorë për të bllokuar hetimin dhe transparencën mbi vjedhjen e shekullit. Dje, deputetët e urdhëruar prej tij dhe ministri Gjiknuri, prishën seancën duke penguar dhënien e dëshmisë. Sot në orën 17.00 ishte parashikuar seanca e radhës, por asnjë deputet i Ramës nuk u paraqit dhe as ministri Gjiknuri që duhej të jepte dëshminë.
Edi Rama jo vetëm po tregon se nuk mund të përballet me faktet që tregojnë përfshirjen e tij në këtë aferë, por po shkel haptas ligjin për hetimin parlamentar, një e drejtë kushtetuese e konfirmuar edhe me vendim të Gjykatës Kushtetuese. Kjo tregon frikën e Ramës nga e vërteta mbi vjedhjen e shekullit që do zbardhet me cdo kusht. Përgjegjësit për vjedhjen e 470 milionë Eurove nuk do të shmanging dot ditën e tyre para drejtësisë së pavarur dhe të pakapur”, deklaron PD.
