Gjermania pas natës së mbrëmshme ndodhet në alarm, pasi një sulm i ri terrorist mund të jetë i pashmangshëm në Berlin. Një fakt i tillë bëhet i ditur nga ‘Die Welt’, pasi siç raporton edhe media gjermane autoritet i druhen një sulmi të dytë sepse autori nuk është arrestuar.
Pas lirimit të 23-vjeçarit Naved B, nga Pakistani, i cili u arrestua nën dyshimin se ishte autor i masakrës me kamion në tregun e Krishtlindjeve në Berlin, ku humbën jetën 12 persona si dhe u plagosën 48 të tjerë, policia është në kërkim të terroristit, i cili lëviz i lirë.
Prokurorët gjermanë thanë se i dyshuari është liruar për shkak të mungesës së provave. Një burim i sigurt për ‘Bild’ thotë se nuk dihet nëse autori ka qenë ‘ujku’ i vetëm i aktit, apo pas tij fshihet një qelizë e madhe terroriste.
Ndërkohë, prokurori i Berlinit, Holger Münch ka paralajmëruar për një “kërcënim serioz” të një sulmi “të rëndësishëm” terrorist, ndërsa u ka bërë thirrje qytetarëve që të qëndrojnë në vende të mbyllura. Në të njëjtën linjë ka qëndruar edhe ministri i Punëve të Brendshme gjermane Klaus Bouillon, i cili pohoi se Gjermania është “në gjendje lufte” pas masakrës së mbrëmshme.
