Pak muaj para zgjedhjeve dy partitë e koalicionit qeverisës duket se nuk e kanë gjetur gjuhën e përbashkët për reformën zgjedhore. Lëvizja Socialiste për Integrim dhe Partia Socialiste shkëmbyen replika në distancë sot nëpërmjet nënkryetarit Luan Rama dhe deputetit Taulant Balla.
Luan Rama në emër të LSI-së kërkoi konsensus për këtë reformë dhe nxiti PS e PD të shpejtojnë.
“PS dhe PD të shprehin, jo thjesht vullnetin, por të demonstrojnë angazhim e tyre real për të bërë real realizimin e Reformës Zgjedhore”, u shpreh Luan Rama.
Por nga ana tjetër deputeti Taulant Balla, njëherësh edhe kryetari i Komisionit për Reformën i kërkon kolegut të tij në koalicion se barazlargimi i tij, duke fajësuar po njësoj edhe PS edhe PD për Reformën Zgjedhore.
“Luan Rama duhet ta dije se PS dhe LSI jane bashke ne Komisionin e Reformes Zgjedhore dhe kane qendrime plotesisht te dakordesuara mbi rekomandimet e OSBE/ODHIR-it. Po ashtu Luan Rama me siguri e di qe kemi nje muaj qe presim qe PD te behet pjese konstruktive e punes se komisionit per ta mbyllur reformen. Prandaj Luan Rama le t’i beje thirrje PD sic i bejme edhe ne po ashtu, sepse roli i dyfishte i skuadres dhe arbitrit nuk ka me asnje kuptim!”, shkruan Balla në faqen e tij të “Facebook”.
Jo pa ironi Balla thotë se respekti për këtë skuadër është minimumi që duhet të tregojë miku Luan Rama pavarësisht se mund t’i ketë rënë të bëjë pjesën e arbitrit!
“PS dhe LSI kane bere nje pune shume serioze ne komision dhe respekti per kete skuader eshte minimumi qe duhet te tregoje miku Luan Rama pavaresisht se mund t’i kete rene te beje pjesen e arbitrit!”, vijon postimi i Ballës.
Ndërsa PS është në pritje të ‘fjalës’ nga LSI nëse Meta do të ribëjë koalicion me Ramën, përplasjet mes këtyre dy forcave kanë qenë të shpeshta kohët e fundit.
