Deputeti Ben Blushi akuzoi sot publikisht nga foltorja e parlamentit qeverinë, se ka lidhje të ngushta me krimin.
Referuar lirimit të ish-kreut të “Bandës së Durrësit”, Lulzim Berisha, pak ditë më parë Blushi deklaroi se qeveria ndihmon kriminalitetin dhe kanabizimin e vendit, pasi sipas tij, me këto të dyja mund të vjedhë zgjedhjet.
Blushi solli rastin e kreut të Bashkisë së Durrësit, që kishte ndërhyrë në lirimin e Lulzim Berishës, kreut të Bandës së Durrësit, dhe kishte garantuar punësimin e tij.
“Vangush Dako bëri sekserin mes vrasësit dhe gjykatësit.Pikërisht, prej lidhjes që kjo qeveri ka me krimin BE i mbylli dyert e negociatave”, tha Blushi.
Sipas tij, qeveria me këto veprime ka diskretituar vetingun dhe reformën në drejtësi. Ai tha se nëse qeveria do ta bëjë vetingun për të frikësuar dhe nënshtruar gjykatat, atëherë rezultati është i frikshëm.
“Është shumë e rëndë për këtë qeveri. Padyshim problemet me gjyqësorin kanë qenë në Shqipëri, kanë ekzistuar për gati 25 vite. Ka shumë shqiptar se besojnë sot që gjyqtarët në Shqipëri bëjnë drejtësi. A mund të hy në fuqi ligji i vettingut? Unë nuk besoj, Po pse kërcënohet drejtësia në Shqipëri? “Po kërcënohet nga Gjykata Kushtetuese. Nuk është vetëm kaq. Dua të marr rastin që ndodhi në Durrës. U lirua një person që ka vrarë 5 vetë. Pse u lirua ai? U lirua se një kryetar bashkie, fytyra e vërtetë e Rilindjes, i dha një vlerësim pozitiv dhe bëri sekserin, mes gjykatësit dhe vrasësit. Është politika mbas vendimeve të gjyqësorit. Si ka mundësi që një shumicë si rilindja e ka të përsëritur këtë gjë? Rasti i Kavajës, i Durrësit. Për mos të folur shumë për këta deputet këtu. Kush ndërhyn tek gjykatat në Shqipëri? Çfarë ndodhi në Durrës? Kë do marrin në punë? Njërin që është vrasës? E ta çojnë të pastrojë bulevardin e Durrësit”, tha Blushi.
“Ne nuk hyjmë dot në BE për shkak të lidhjeve të qeverisë me krimin. Në këtë parlament ka deputetë që kanë vrarë dhe votuan buxhetin para dy javësh. Shqiptaret nuk besojnë se vettingu është real. BE konsideron problem drogën prandaj po pengohet integrimi. Këta janë bosë droge që mbrohen nga qeveria, siç ishte rasti i vrasjes së Durrësit. Kriminalizimi është shtuar nga kjo qeveri. Me procesin e shtyrjes së negociatave edhe skepticizmi po rritet. BE ka probleme, por ne kemi më shumë, pasi procesi i integrimit tonë po kthehet në gjagjezë. Qëllimi i të gjitha këtyre është blerja e votës. Në këtë çorbë të dyja palët janë njësoj, pasi kur opozita dështon është edhe më e rendë. Opozita nuk ka sjellë ënde një amendament për procesin zgjedhor. Në 6 muaj nuk po mblidhni dot një komision. Në qershor nuk do ketë votim elektronik dhe votat do i numërojnë këta që vijnë nga radhët e kanabisit. Këta do jenë në krye të komisioneve zgjedhore”, vijoi ish-deputeti i PS-së.
