Dritat e Kullës Eiffel, emblemë e Parisit, do të fiken sot duke nisur nga ora 20:00 (19:00 GMT) në mbështetje të Alepos, përballë situatës të shumë të rëndë që po përjetojnë banorët banorët e qytetit sirian, njoftoi Bashkia e Parisit.
”Ky veprim simbolik, në një monument të vëzhguar në mbarë botën, synon t’i bëjë thirrje edhe njëherë komunitetit ndërkombëtar të reagojë me urgjencë”, theksoi kryetarja e Bashkisë së Parisit, Anne Hidalgo, në një komunikatë.
“Rrugët e fundit të Alepos akoma të mbajtura nga opozita po merren nga regjimi duke shkaktuar qindra viktima”, shtoi ajo.
Hidalgo theksoi se një autokolonë humanitare mjekësore do të niset të enjten për në Alepo, përbërë nga dy kamionë të ngarkuar me materiale dhe pajisje mjekësore të dërguara nga Bashkimi i Organizatave të Shpëtimit dhe Kujdesit Mjekësor (UOSSM).
Këto materiale do t’i shpërndahen strukturave sanitare dhe spitaleve të qytetit sirian.
