Ish-Ministri i Jashtëm, Besnik Mustafaj, vlerëson ecurinë e Partisë Demokratike në 26 vitet e saj, por kërkon mobilizim në këto muaj të mbetura deri në zgjedhje për tu rikthyer në pushet. Mustafaj thotë se nuk duhet të priret vetëm nga konsumi i qeverisë. Ndërsa ish-deputeti, Preç Zogaj, vlerëson lidershipin e Lulzim Bashës, duke u shprehur i bindur se PD do të mund ti fitojë zgjedhjet në 2017.
Partia Demokratike festoi 26-vjetorin e themelimit dhe kontributit të saj në shoqërinë post-komuniste shqiptare.
Më shumë se sa gjysmën e viteve të saj e kaloi në pushtet, por si shihet sot kjo forcë politike nga personalitetet të cilët kontribuan dhe investuan në jetën e saj?
Mustafaj: Problemi është që sfidat e reja që ka Shqipëria duhet të përballohen përsëri nga Partia Demokratike dhe nga e djathta në përgjithësi, sepse menaxhimet e majta kanë treguar në të gjitha vendet e tjera europiane se e kanë thelluar krizën.
Zogaj: Unë shikoj se ka një përpjekje të madhe në gjithë piramidën e PD-së për të gërshetuar figurat dhe kontributet historike me kontributet e reja dhe kjo i shkon një partie të djathtë.
Ish-Ministri i Jashtëm, Besnik Mustafaj, vlerëson opozitën e Lulzim Bashës, por thotë se Partia Demokratike nuk mund të shpresojë që rikthimi në pushtet të vijë vetëm nga konsumi i qeverisë së majtë.
Mustafaj:Tranzicioni në lidershipin e PD-së ka qenë i ndërlikuar, i vështirë, sepse pas Berishës dhe pas asaj humbje lidershipi i ri kishte sfida shumë të mëdha në kushtet e mungesës së përvojës, në kushtet e një rinovimi të përgjithshëm të PD. Unë besoj se ka ende muaj intensive pune për PD që ajo të bëhet vërtet zëri i pakënaqësisë dhe alternativë për zgjidhjen e problemeve. Sepse pakënaqësia në vetëvete thjesht si pakënaqësi nuk përkthehet në votë për opozitën nëqoftëse opozita me programin e saj politik, me figurat që i ofron shoqërisë shqiptare nuk i përgjigjet si duhet.
Ndërsa ish-deputeti dhe themeluesi i Partisë Demokratike, Preç Zogaj, vlerëson ndryshimet në Partinë Demokratike, ndërsa është optimist se në zgjedhjet e 2017-ës, ajo do rikthehet në pushtet.
Zogaj: Është 11 dhjetori i fundit që e gjen këtë parti në opozitë për këtë rradhë. Besoj se do të jetë në pushtet.
Rinia është më entuziaste, ndërsa thotë se me Lulzim Bashën, hapësirat për ta janë zgjeruar ndjeshëm.
“Unë besoj shumë dhe jam shumë optimiste se PD mund të kthehet në pushtet sepse është momenti më i mirë ku të rinjtë ta gjejnë veten pas pjesa më e madhe e tyre janë zhgënjyer”
Ndërsa anëtarëve që e kanë ndjekur këtë forcë politike në gjithë rrugëtimin e saj, dita e rikthimit në pushtet ju ngjall padurim.
“Ne mendojmë që duhet të vimë para në pushtet, me zgjedhje të parakohshme”.
