Dy boksierë në Angli si dhe stafet e tyre janë përfshirë në një sherr live në konferencën për shtyp para takimit. Gerec Chisora, njëri nga boksierët ka tejkaluar cakun duke sulmuar kundërshtarin.
Gjatë debatit, në një moment, Chisora është ngritur në këmbë dhe ka marrë në krahë tavolinën, të cilën ia ka hedhur rivalit Whyte dhe stafit të tij, duke bërë që të nisë një sherr masiv. U desh ndërhyrja e forcave të sigurisë që të mos shpërthente një duel i parakohshëm, ndërkohë që gjithçka u zhvillua në prani të mediave.
Dy boksierët po debatonin ashpër mes tyre gjatë kohës që ndodhi incidenti në konferencën e shtypit. “Ne të dy e dimë se çfarë do të ndodhte nëse na lini vetëm në një dhomë të mbyllur. Ai ka patur gjithnjë frikë nga grushtet e mia”, tha Whyte, që acaroi në maksimum Chisora.
Pa u përfshirë nuk kanë mbetur as stafet, veçanërisht ai i Whyte. Njëri prej tyre nuk e ka duruar dot reagimin e Chisora dhe e ka goditur këtë të fundit me shishe. Një sherr që garanton një përballje të fortë ditën e shtunë mes dy boksierëve britanikë, teksa duelohet për titullin kampion të peshave të rënda të Britanisë së Madhe.
