Vendimi i Niko Rosbergut për t’u tërhequr menjëherë nga garat Formulës 1 pasi u shpall kampion bote ka habitur të gjithë.
“E ngjita malin tim, arrita në majë, ndaj mendoj se është momenti i duhur”, shkruan 31-vjeçari në mesazhin e lamtumirës.
“Vendosa ta mbyll tani karrierën time në Formula 1. Është e vështirë për t’u shpjeguar. Qysh kur isha gjashtë vjeç, ëndrra ime ishte të bëhesha kampion bote. Dhashë gjithçka dhe e realizova synimin me punë të madhe, sakrificë e dhimbje. Ia dola me ndihmën e atyre që më rrethojnë – tifozëve, familjes dhe miqve”, shton kampioni i saposhpallur.
“Ishte një përvojë e pabesueshme, – vijon Rosberg duke iu referuar rrugëtimit të tij në F1. – Por ishte edhe shumë i vështirë, sidomos humbjet në dy vitet e fundit kundër Ljuisit. Kam shtyrë si i çmendur, ishte një sakrificë e familjes sime, e cila më qëndroi pranë drejt këtij objektivi”.
Lidhur me garën e fundjavës së shkuar në Abu Dabi, që e kurorëzoi kampion, piloti gjerman shprehet: “Në mëngjes e dija që mund të ishte gara ime e fundit. Doja të shijoja çdo moment. Semafori u fik dhe bëra 55 xhirot më intensive të jetës sime. Vendimin e mora të hënën në darkë. Pasi reflektova për një ditë, njerëzit e parë të cilëve ua thashë ishin Vivian (bashkëshortja) dhe Xhorxh (Bolt, drejtuesi i ekipit të Mercedesit). Menjëherë më pas i thashë Totos (Volf, drejtori ekzekutiv i Mercedesit)”.
Largimi i tij do t’i mungojë garave me makina pasi ai ishte një pilot i fortë duke i rëmbyer edhe titullin kampion shokut të skuadrës Hamilton.
