Negociatat për integrimin në Bashkimin Evropian për Shqipërinë do të hapen në momentin që do të nisë zbatimi i reformës në drejtësi, dhe më konkretisht ligji i Vettingut. Kjo ishte deklarata e kryeministrit Edi Rama i ftuar në emisionin Top Story. Rama u shpreh se Shqipëria nuk mund t’i kërkojë BE¬së që të zhbllokojë integrimin në një kohë kur ky proces po bllokohet nga brenda vendit.
I pyetur në lidhje me vizitën e Ramës në Beograd dhe nënshkrimi i marrëveshjeve që anashkalojnë Kosovën, Rama është shprehur se nuk e di të ketë ndonjë anashkalim. Por për deklaratat e ministrit të Jashtëm të Kosovës, Enver Hoxhaj, kreu i qeverisë së Shqipërisë është shprehur se flet me presidentin dhe kryeministrin e Kosovës.
“Unë flas me Presidentin Hashim Thaçi dhe me kryeministrin, e jemi në një vijë bashkë. Me ministrin e Jashtëm nuk kam ndonjë miqësi, por kemi një marrëdhënie bilaterale”, është shprehur Rama.
Gjatë intervistës kreu i maxhorancës, deklaroi se Rusia nuk është armik i Shqipërisë, por Rusia ka një strategji të qartë për të rritur ndikimin e saj në Ballkan. Rama thotë se drejtimi Perëndimor i Shqipërisë nuk e pengon që të ketë dialog me Rusinë. I pyetur nëse do ta takonte Presidenti rus, Vladimir Putin, Rama u përgjigj se nuk do të nguronte.
