Janë shtuar tensionet brenda maxhorancës vetë pak muaj nga zgjedhjet e përgjithëshme të vitit 2017. Vëllai i ministrit të Mjedisit, Lefter Kokës, Leonard Koka ka patur përplasje të ashpra me ministrin e Jashtëm, Ditmir Bushati.
Kështu, “Syri.net”, publikoi disa SMS ku Leonard Koka bënte sherr me ministrin Bushati për emërime në diplomacinë shqiptare. Në një moment, madje ai edhe e shan ministrin Bushati. I kontaktuar nga “Panorama.al”, Leonard Koka ka pranuar se SMS-të janë autentike.
Ai ka thënë se biseda me ministrin në “whatsapp” është bërë rreth 1 orë para publikimit të lajmit mbi përplasjen. Koka ka thënë se ministri Bushati është person i korruptuar dhe se merr para për emërimet në trupin diplomatik – ambasada dhe konsullata.
Ai tha gjithashtu se do ta denoncojë ministrin Bushati në ditët në vazhdim. Kujtojmë se Leonard Koka është një nga personat që ka ndërmjetësuar mes Metës dhe Ramës për marrëveshjen e 1 prillit, që u finalizua me koalicionin PS-LSI që fitoi zgjedhjet në vitin 2013.
