Policia e Gjirokastrës ka sekuestruar 28 kg kanabis në pikën kufitare të Kakavijës dhe ka vënë në pranga një 43-vjecar nga Tepelena.
Sipas të dhënave zyrtare, ditën e sotme në dalje të Republikës së Shqipërisë është paraqitur shtetasi Dashnor Hamza, me mjetin tip “Lancia Phedra”, me targa AA 458 MA. Pas regjistrimit në sistemin TIMS nga punonjësit e Policisë Kufitare, mjeti ka kaluar në vijën e dytë për një kontroll më të imtësishëm.
Gjatë kontrollit të ushtruar në vijën e dytë, në një vend të sajuar në shasinë e automjetit kishte disa pako me lëndë të dyshuar narkotike si ajo e llojit Cannabis Sattiva.
Menjëherë efektivët e Policisë Kufitare kanë bërë bllokimin mjetit, duke njoftuar grupin hetimor si dhe Specialistët Kundër Lëndëve Narkotike në Drejtorinë Vendore të Policisë Gjirokastër.
Gjatë kontrollit të imtësishëm nga grupi hetimor, në shasinë e mjetit u gjetën 28 pako me lëndë të dyshuar narkotike e llojit Cannabis Sattiva, me peshë totale 28 kg. Policia ka bërë menjëherë arrestimin e 43-vjecarit Dashnor Hamza, banues në fshatin Xhafaj, Tepelenë.
Materialet procedurale do t’i referohen Prokurorisë së Krimeve të Rënda Tiranë për veprën penale “Trafikimi i narkotikëve”.
