Momente ankthi për familjarët e 72 personave që ndodheshin në bordin e një avioni, i cili u rrëzua në qytetin Medelin të Kolumbisë. Ndërsa nëntë persona janë të ekuipazhit. Mediat e huaja raportojnë se në bord ndodhej edhe një ekip brazilian i futbollit, Chapecoense.
Shkaku i rrëzimit nuk dihet ende, por në atë kohë raportohet se ka pasur shira dhe bubullimë. Autoritetet dhe ekipet e shpëtimit janë aktivizuar menjëherë, por një helikopter i forcës ajrore është dashur të kthehet prapa për shkak të shikueshmërisë së dobët. Ndonëse nuk ka ende shumë qartësi rreth ngjarjes, mediat e huaja raportojnë se së paku 6 persona janë të mbijetuar nga rrëzimi i avionit në një zonë malore të qytetit kolumbian Medelin, raporton RT.
Brenda në bord ishte dhe ekipi i futbollit Chapocoense i cili do të luante më 1 dhjetor në finalen e kupës së Amerikës së Jugut me ekipin e Medellin Atletico Nacional. Nuk ka ende shumë detaje rreth ngjarjes, por theksohet se avioni u rrëzua në një zonë malore, në rrethana që presin ende të hetohen.
Ngjarja u përshkrua si tragjedi e përmasave të mëdha, ndërkohë që përfaqësues të skuadrës bëjnë thirrje për lutje. “Ne lutemi për Chapecoense dhe të gjithë ekuipazhin në këtë kohë të vështirë. Të gjithë të rinjtë e ekipit janë me ju”¬ thuhet në faqen zyrtare.
