Janë publikuar pamjet e atentatit me snajper ndaj Nolgert Patës i cili u vra më 20 nëntor në qytetin e Fierit.
Edhe pse Pata u ekzekutua në një atentat të ngritur nga dy persona, ndaj tij janë zhvilluar edhe më herët atentate që kërkonin asgjësimin e tij. Në një video të siguruar nga “Top Channel”, shihet atentati i organizuar ndaj Patës më 21 gusht në zonën e ish-Parkut të autobusëve në Tiranë.
Ai është nën shoqërinë e tre personave dhe sapo ndahet prej tyre duke iu drejtuar një automjeti të blinduar qëllohet me snajper. Në atë kohë u plagos në vesh dhe i mbijetoi atentatit.
Atentati i dështuar ndodhi pak kohë pasi kishte dalë nga burgu. Policia e shpalli atë në kërkim për mos kallëzim krimi. Pata ishte akuzuar nga drejtësia për shfrytëzim prostitucioni për të cilën edhe është dënuar, ndërsa ekzekutimi i tij lidhet me trafikun e drogës dhe përplasjet mesa bandave të Tepelenës. Pata njihej si armik i Elton Çiços, gjithashtu i ekzekutuar, ngjarje e ndodhur më 1 maj në një lokal në ish-Bllok.
