Kryeministri Edi Rama pranoi sot zyrtarisht se Shqipëria nuk do të mund të hapë negociatat me Brukselin për anëtarësim në Bashkimin Europian gjatë këtij viti.
Duke folur nga aktiviteti me veteranët për festën e 29 Nëntorit, Kryeministri theksoi përsëri se pengesa e vetme është ligji i vetingut dhe për këtë fajësoi si gjithmonë opozitën.
Sipas Kryeministrit, hapja e negociatave nuk do të jetë e mundur këtë vit për sa kohë Vetingu është i bllokuar në Kushtetuese dhe në këtë pikë ka kërkuar ndihmën e qytetarëve.
Thirrja e Ramës u adresohet votuesve të Partisë Demokratike që të ushtrojnë presion mbi lidershipin e PD në mënyrë që tërhiqen nga padia që i kanë bërë në Gjykatën Kushtetuese ligjit të Vetingut.
“Me lejoni t’i ndaj me ju përgëzimet e Kancelares Merkel, me Ilir Metën pa të cilin reformat tona të thella do kishin qenë të pamundura por edhe me partnerin tjetër tonë gjithashtu, me anëtarët e qeverisë së koalicionit dhe me grupet parlamentare që kanë mbështetur çdo projekt të qeverisë dhe në fund me qytetarët shqiptarë pa asnjë dyshim, por jo me opozitën.
E kam të pamundur të bëj sikur nuk e shoh atë që PD po bën për ta rrënuar imazhin e Shqipërisë duke u përpjekur ta pengojë vendin tonë në rrugën e negociatave, për ta bindur Brukselin që ky vend është Kolumbi, që shumica parlamentare shqiptare është një strofull kriminelësh.
Jo Brukseli as Gjermania, Franca apo cilido vend, por opozita jonë i ka ngritur Shqipërisë një mur që pengon çeljen e mënjëhershme të negociatave, që është ligjin i vetingut.
Dua t’ju bëj sot thirrje votuesve të PD të ushtrojnë presion mbi lidershipin dhe ata deputetë të opozitës që janë pjesë e zgjedhjes për ta ngritur atë mur që ta heqin atë mur, për të plotësuar kushtin e vetëm të çeljes së negociatave, që është zbatimi i ligjit të vetingut”, tha Edi Rama.
