Policia e Tiranës ka arrestuar një 16-vjeçar, pasi akuzohet se ka ushtruar dhunë ndaj nënës së tij dhe ka shkatërruar orenditë e banesës.
Sipas bluve të kryeqytetit në pranga ka rënë 16-vjeçari me iniciale K.P.. Ngjarja për të cilën akuzohet adoleshenti ka ndodhur një ditë më parë, në banesën e familjes së tij në rrugën “Shyqyri Ishmi”, në Tiranë.
Dyshohet se i riu, duke përdorur një sharrë dore për prerje metalesh, ka shkatërruar orenditë shtëpiake si dhe në mënyrë të përsëritur, ka ushtruar dhunë fizike dhe psikologjike ndaj nënës së tij, A.M., 45-vjeçe.
Materialet në ngarkim të 16-vjeçarit i kaluan Prokurorisë pranë Gjykatës së Shkallës së Parë Tiranë, për veprat penale “Dhuna në familje” dhe “Shkatërrim i pronës me mjete të tjera”.
