Pas dy viteve hetim nga ana e policisë italiane, është zbuluar një grup grabitësish i drejtuar nga shqiptarë. Në prangat e policisë ka rënë edhe një 42-vjeçar nga Shqipëria banues në Prato, i cili deri më tani ishte pa asnjë rekord negativ në thyerjen e ligjit, pasi bënte një jetë të dyfishtë.
Ai jetonte në mënyrë të rregullt në Itali bashkë me gruan dhe fëmijët, por në dy vite bashkëpunëtorët e tij kanë marrë pjesë në të paktën 50 grabitje me një vlerë mbi 50 000 euro.
Shqiptari mbeti i befasuar kur policia shkoi në banesën e tij në Viale Vittorio Veneto, ku ishte identifikuar prej disa ditësh. Gjykata ka konfirmuar arrestimin e tij dhe ai u dërgua në burgun e Trentos. Hetimet për të dhe grupin e bandave të njerëzve nga Evropa Lindore nisi nga policia e Trentos dhe Bolzanos.
Gjatë operacionit, më herët janë arrestuar edhe 5 shqiptarë, të gjithë anëtarë të një bande të specializuar për vjedhjen e vilave dhe apartamente.
