Kryeministrit Edi Rama, duket se nuk i del e keqja me Ben Blushin.
Lapsi.al mësoi se masa e fundit “ndëshkimore” është heqja nga lista e librave shkollorë e teksit “Beni ecën vetë”, një roman i shkruar nga Kiço Blushi 40 vjet më parë.
Ky libër ka qenë për vite me radhë një tekst jashtëshkollor, pjesë e listës së leximeve të detyrueshme për fëmijët, si një material edukativ dhe atraktiv. Ai është shoqëruar edhe me ilustrime nga filmi i regjisores Xhanfise Keko, me të njëjtin titull.
Autori Kiço Blushi, ka marrë shkas për këtë libër nga djali i tij, Ben Blushi, atë kohë 7 vjeçar. Vetë deputeti i sotëm pati rrëfyer kohë më parë se “mund të kem qenë 6 apo 7 vjeç atëherë kur është bërë ky film. Sigurisht, kam shumë kujtime, sepse mbaj mend babain kur e shkruante, pastaj kur filmi do xhirohej dhe unë nuk ankohesha pse isha kështu si më kanë nxjerrë, por ankohesha pse s’duhej ta luaja unë filmin”.
Për herë të parë këtë vit, libri “Beni ecën vetë” hiqet nga kjo listë, gjë që nuk ka ndodhur asnjëherë tjetër. Ndërkohë që në Kosovë, libri vazhdon të jetë pjesë e programit mësimor të nxënësve, ministria e Arsimit në Shqipëri, e ka “dënuar” Benin, personazhi i dikurshëm i të cilit sot është deputet dhe themelues i partisë Libra, në opozitë me kreyministrin Rama.
