Gjatë mbledhjes së sotme në Komisionin e Jashtëm Parlamentar, ish -deputeti socialist Ben Blushi akuzoi kryeministrin Edi Rama se e përdor diplomacinë vetëm për të marrë vota.
Gjatë diskutimit të buxhetit të Ministrisë së Jashtme ai kërkoi të dinte si shpenzoheshin paratë e buxhetit të shtetit. Por për këtë ai kërkoi sqarime nga Ministria e Financave, duke injoruar tërësisht ministrin e Jashtëm, Ditmir Bushati që ishte në mbledhje.
“Nuk ia vlen të merremi se sa financiohet apo jo Ministria e Jashtme dhe diplomacia në Shqipëri, e cila, siç e thashë, do ishte mirë të financohej pak më shumë nga buxheti. Duhet të jemi të qartë çfarë është një buxhet. Do doja të ishte këtu ndonjë përfaqësues më i lartë i Ministrisë së Financave. Ne nuk mund të bëjmë debat politik me zonjën (përfaqësuese e ministrisë së Financave). Faleminderit edhe për përgjigjet që dhatë. Çështja është çfarë është një buxhet, që është si arka e një shtëpie, kujt ia merr paratë dhe kujt ia jep, është themelore, kujt ia merr dhe si i shpenzon”, u shpreh Blushi.
Ministri Bushati reagoi duke thënë se kolegët nuk duan të dëgjojnë të vërtetën.
“Në rast se kolegët deputetë kanë dëshirë të diskutojnë për cështje të tjera, besoj jeta parlamentare, Kushtetuta, rregullorja ofrojnë të gjithë mekanizmat e duhura dhe kemi mundësi për të pasur një diskutim… sepse nga çpo dëgjoja unë këtu deri tani, pyetja ime e parë që doja t’u thoja këtu është a jeni të interesuar për të vërtetën?”
