Kuvendi ka zgjedhur sot me votim të fshehtë anëtarët e Autoritetit për Informimin për Dosjet e Sigurimit.
Në votim nuk mori pjesë Partia Demokratike, edhe pse në listën e kandidatëve ajo kishte propozuar Selami Zallin.
Mazhoranca miratoi fillimisht kandidaturën e Gentiana Sulës, e propozuar nga Këshilli i Ministrave.
Ajo mori 77 vota pro, një kundër dhe një abstenim.
Ndërsa në votimin për kandidaturat e propozuara nga tre partitë kryesore, ku nga 3 emra do të miratoheshin dy, më shumë vota morën kandidatët PS dhe LSI.
Altin Hoxha i propozuar nga LSI mori 76 pro, një kundër, tre abstenim, kurse Mariglen Kasmi i propozuar nga PS mori 77 pro dhe tre kundër.
Ndërsa kandidati i propozuar nga PD, Selami Zalli mori nëntë pro, 67 kundër dhe katër abstenim.
Dy anëtarët e tjerë të Autoritetit për Informimin për Dosjet e Sigurimit u propozuan përkatësisht Daut Gumeni nga shoqatat e të përndjekurve, që mori 76 pro dhe tre kundër dhe Simon Mirakaj i propozuar nga shoqatat për të drejtat e njeriut, që u miratua po me 76 vota pro dhe tre kundër.
