Policia kufitare e Qafë-Thanës në bashkëpunim me policinë e Korçës kanë sekuestruar 54 kg kanabis.
Lënda narkotike e ndarë në 70 pako u gjet në një kamion, ndërsa policia bëri arrestimin e drejtuesit të mjetit, shtetasin Gentian Qarri, 41 vjeç, banues në Tiranë.
“Shtetasi i lartpërmendur, është paraqitur në dalje të Republikës së Shqipërisë, me mjetin kamion tip “DAF” me targa AA348OX/AER353. Nga shërbimet e Policisë Kufitare, ky i fundit është përzgjedhur për kontroll, fillimisht në vijën e dytë. Pasi janë krijuar dyshime për trafik të lëndëve narkotike, kamioni iu nënshtrua më tej, procesit të skanimit. Gjatë kontrollit të imtësishëm të ushtruar nga shërbimet e policisë pas verifikimit në skaner rezultoi se në pjesën e poshtme të dyshemesë së rimorkios me targa AER353, u konstatuan të fshehura si dhe u sekuestruan me cilësinë e provës materiale 70 pako të mbështjella me letër natriban, me peshë 54 KG lëndë e dyshuar si narkotike Cannabis Sattiva”, sqaron policia.
Shtetasi Gentian Qarri, u arrestua në kushtet e flagrancës ndërsa materialet hetimore i kaluan Prokurorisë të Krimeve të Rënda në Tiranë, për veprën penale “Trafikimi i narkotikëve, mbetur në tentativë”.
