Ministri i Brendshëm, Saimir Tahiri shpalli dje fushatën sensibilizuese “Mos gjuaj, por duaj”, për mbledhjen e armëve të paligjshme. Dhe ai kritikoi të rinj e të reja, në veçanti artistë e këngëtarë, që sjellin një model negativ duke u shfaqur me armë në rrjetet sociale apo nëpër videoklipe.
“Ju jeni përdorues intensiv të të drejtave sociale. Edhe mua më ka rënë në sy se si të rinj apo të reja, shpesh herë artistë, akoma më shpesh këngëtarë, venerohen si model pozitiv edhe kur i shfaqen publikut me një armë në dorë. Në fakt ky është një problem jo i vogël i shoqërisë për sot dhe për gjithçka duam të bëhemi nesër”, u shpreh ministri Tahiri.
Por nuk ka vonuar reagimi i këngëtarëve. Stresi, që shfaqet me armë në një nga videoklipet e tij ka këtë përgjigje:
“I bie që të ndalohen edhe filmat shqiptarë që jnë partizan vriste 10 gjermanë. Duke qëne se tani sapo është zgjedhur presidenti i r ii SHBA, i bëj thirrje Tahirit t’i bëjë një kërkesë që të ndalojë të gjithë filmat e Hollivudit, ku janë pamje aksion me armë, luftë apo kaubojsa”.
Edhe reperi tjetër 2PO2 u kujton ministrit Tahiri se nuk janë vetëm këngëtarët shqiptarë që përdorin armë në klipet e tyre.
“Jam artist, nuk kam lidhje me armët. Unë nuk mendoj ashtu. Mendoj se repi, veçse është art, është edhe një lëvizje që paraqet edhe vetitë negative. Nuk janë vetëm artistët shqiptarë që përdorin armë në videoklipe”.
Nuk i ka shpëtuar fushata e Tahirit për t’u shkuar derë më derë qytetarëve për t’i sensibilizuar për dorëzimin e armëve as ironisë së Bujar Kapexhiut, i cili i përgjigjet si zakonisht me një karikaturë.
