Mediat italiane kanë dhënë detaje mbi aksidentin e ndodhur në qytezën e Ponsaço në Pisa ku humbi jetën një 45-vjeçare shqiptare.
Aksidenti ndodhi rreth orës 17:30 të së hënës. Shqiptarja, nënë e tre fëmijëve, është identifikuar si Diana Brahimi, e cila punonte si estetiste. Ajo ishte duke ecur në trotuar kur është përplasur nga një makinë që drejtohej nga një italian i moshuar. Viktima mbetur e bllokuar poshtë automjetit dhe është dashur ndërhyrja e zjarrfikësve që me jastëk me ajër dhe me ndihmën e një vinçi arritën të ngrinin makinën në ajër, dhe të nxirrnin nga poshtë saj, trupin e pajetë të shqiptares. Ai që ngiste makinën ishte një italian rreth të 90-tave, që pas aksidentit u shtrua në spital në gjendje shoku. Sipas rindërtimit paraprak të ngjarjes nga policia e Ponsaço, italiani ka humbur kontrollin e makinës dhe përfundoi mbi trotuar duke goditur shqiptaren.
