Ish-kryeministri Sali Berisha nuk është paraqitur sot për të dëshmuar në Komisionin Hetimor për çështjen CEZ.
Deputeti demokrat ishte thirrur në seancë si dëshmitar.
Pas kërkesës së bërë nga deputeti Taulant Balla, që i bëri thirrje nga Kuvendi ish-kryeministri Sali Berisha që të shkonte për të dëshmuar në Komisionin Hetimor për çështjen CEZ, ai nuk ka pranuar që të jetë prezent.
Mirëpo, ndaj tij ka edhe një shkresë, e cila thotë se nëse ai nuk paraqitet për të dëshmuar në të, atëherë do të shkoje policia ta marrë me forcë.
Letra është firmosur nga Taulant Balla.
Po kështu, dy javë më parë, nga foltorja e parlamentit, deputeti Balla i kërkoi Berishës të paraqitet në komisionin hetimor të ngritur për çështjen e CEZ, në të kundërt do të angazhohet policia për ta sjellë, në bazë të ligjit që kanë komisionet hetimore.
“Zoti Sali Berisha, je thirrur dëshmitar në këtë komision për të dëshmuar. Kemi marrë një përgjigje nga kreu i PD se në seancën e parashikuar para pak kohësh s’kishe mundësi të vije, se vetë nuk përgjigjesh ti. Tani po ta them këtu në sallën e Kuvendit të Shqipërisë sipas ligjit për komisionet hetimore, je i detyruar të vish me vullnet të lirë, në të kundërt do ti kërkojmë Policisë së Shtetit të të sjellë me zor në komision hetimore, ta dish”- i tha Balla.
