Dy deputetët e Partisë të sapokrijuar, LIBRA, Ben Blushi dhe Mimoza Hafizi, kanë konfirmuar dje votën kundër ligjit që lejon importin e mbetjeve në Shqipëri.
Pas një takimi që zhvilluan me përfaqësues të Aleancës Kundër Importit të Plehrave, deputetja Hafizi kërkoi anulimin e plotë të këtij ligji.
“Dy deputetët LIBRA që janë në Parlament, kemi qenë kundër që në momentin e parë kur ky ligj është paraqitur në Parlament. Të gjitha hapat ne i kemi diskutuar bashkërisht me shoqërinë civile, qoftë kundërshtia që kemi pasur në Komisionin e Veprimtarive Prodhuese”, u shpreh Hafizi.
Ndërkohë që Ben Blushi është shprehur se Partia LIBRA do ta votojë në çdo rast kundër importit e mbetjeve, pasi, sipas tij, Shqipëria ka shumë mbetje dhe ato mjaftojnë për të nxitur industrinë vendëse.
