Gjermania ka fituar lehtësisht, 8-0 ndaj modestëve të San Marinos dhe mbetet në krye të Grupit C me katër fitore pas katër ndeshjeve të para.
Kampionët e Botës, të drejtuar nga Joakim Low, i kanë grumbulluar pikët e plota pa pësuar asnjë gol dhe ndaj San Marios kryen thjesht formalitetin e radhës, para miqësores së luksit, ditën e martë, në Milano kundër Italisë.
Që në minutën e nëntë të ndeshjes, Gjermania e pa veten në avantazh të dyfishtë me golat e shënuar nga Sami Khedira dhe Serge Gnabry, ndërsa kur u mbush gjysmë ore lojë mbrojtësi Hector i çoi shifrat në 3-0. Gnabry dhe Hector, dy lojtarë që konsiderohen si e ardhmja e Gjermanisë, e justifikuan besimin e Low duke shënuar edhe në pjesën e dytë ndaj kundërshtarit modest që renditet në vendin e renditet në vendin e 202-të të klasifikimit FIFA.
Serge Gnabry, 21 vjeç, përfitoi nga rasti për të shënuar edhe golin e tretë personal, të gjashtin për Gjermaninë. Një autogol dhe goli i Volland kompletuan goleadën 8-0 për gjermanët.
Në eliminatoret e tjera të luajtur për Grupin C, Irlanda e Veriut fitoi 4-0 ndaj Azerbajxhanit duke u ngjitur në vendin e dytë me shtatë pikë, pesë më pak se Gjermania kryesuese. Ndërkohë, Çekia ka shënuar golat e parë dhe ka arritur fitoren e parë në eliminatoren e katërt të luajtur, 2-1 Norvegjisë.
