Mediat greke raportojnw se dy persona mbi një motor kanë hedhur granatën para orës 05:00 të mëngjesit jashtë godinës së ambasadës franceze, në rrugen “Vasileos Sofias”.
Ndërtesa ndodhet vetëm pak metra larg Parlamentit grek. Nga shpërthimi raportohet se ka mbetur i plagosur në këmbë polici që ishte roje i ambasadës.
Mësohet se motocikleta e autorëve është gjetur pak minuta më vonë në lagjen “Eksarkia”. Autoritetet nuk kanë dhënë ende detaje për autorin e ngjarjes, por burime policore thonë se akti terrorist mund të jetë vepër e organizatave marksiste që veprojnë në kryeqytetit helen, shkruan “Protothema”. Dyshimet kryesore bien mbi organizatën “komploti i celulave të zjarrit”, disa anëtarë të së cilës janë arrestuar dhe gjykuar. Ngjarja vjen vetëm pak ditë para se presidenti amerikan Barack Obama të vizitojë vendin në datën 15 nëntor. Për sigurinë e vizitës janë angazhuar më tepër se 3000 policë grekë dhe 500 anëtarë të shërbimeve amerikane të sigurisë.
