Burgu 302 në Tiranë, i njohur ndryshe si paraburgimi “Mine Peza” dyshohet se ishte shenjestër e celulës së ISIS-t, e shkatërruar në Shkodër fundjavën e kaluar.
Në këtë paraburgim qëndrojnë disa nga të dënuarit e dosjes së xhihadistëve, të cilët u burgosën me 120 vite burg në Maj të këtij viti nga Gjykata e Krimeve të Rënda. Shërbimet informative të disa vendeve me anë të përgjimeve kanë arritur të kapin biseda mes 4 të arrestuarve në Shkodër për organizimin e një sulmi në këtë burg.
Synimi i tyre ka qenë marrja hak ndaj 9 të dënuarve dhe lirimi i tyre. Drejtimi i celulës së Shkodrës bëhej nga Kosova. Personi që ishte kontakti mes anëtarëve në Shqipëri dhe Kosovë ishte imami i arrestuar Xhezair Fishti.
Hyrje-daljet e tij në Kosovë janë të shumta dhe ka prova që ai është takuar me disa nga të arrestuarit në këtë vend. Përveç rolit si pikë lidhje mes dy vendeve Fishti propagandonte pro Shtetit Islamik në ligjëratat e tij në xhami të ndryshme. Ka dyshime se sulme terroriste mund të kishte edhe në Kosovë për këtë arsye atje u prangosën 7 persona.
Në dosjen e shërbimeve sekrete ka biseda mes të arrestuarve edhe për një sulm të mundshëm në stadiumin e Shkodrës ditën e ndeshjes Shqipëri-Izrael.
Sulmi do të kryhej në mënyrë të sinkronizuar me shpërthime jashtë stadiumit dhe më pas do të qëllonin me armë. E gjithë celula në Shqipëri-Kosovë dhe Maqedoni dyshohet se drejtohej nga xhihadisti më i famshëm shqiptare që lufon përkrah ISIS, Lavdërim Muhaxheri. /Tv Klan/
