I akuzuar për porositjen e një vrasje, e cila nuk ka ndodhur, bizesmeni Ilir Karçini është liruar dje nga gjykata e Lartë i dënuar nga Shkalla e Parë e Krimeve të Rënda me 5 vjet heqje lirie.
Ai është akuzuar nga Prokuroria si një nga të pandehurit e dosjes penale të njohur si “banda e tritolit”.
Një Kolegj Penal i Gjykatës së Lartë vlerësoi dje të drejtë pretendimin e Karçinit për ndryshim të masës së sigurisë, duke caktuar ndaj tij masën e “arrestit shtëpiak”.
Aktualisht, dosja gjyqësore në ngarkim të tij ndodhet në Apelin e Krimeve të Rënda. Ky është vendimi i dytë brenda pak muajsh që liron nga qelia biznesmenin. Fillimisht ai u lirua në gusht të këtij viti nga Shkalla e Parë e Krimeve të Rënda. Argumenti bazë i përdorur nga mbrojtja për ndryshimin e masës së sigurisë për biznesmenin ishte fakti se kohëzgjatja e paraburgimit nuk mund të kalojë gjysmën e maksimales së dënimit të parashikuar për veprën penale që procedohet dhe se ai kishte vuajtur më shumë së gjysmën e dënimit të dhënë.
Ky vendim u ndryshua nga Apeli i Krimeve në tetor. Gjatë gjithë gjykimit, Karçini ka mbajtur qëndrim mohues ndaj akuzës së ngritur ndaj tij, atë të “sigurimit të kushteve për të kryer vrasje”.
