Kur pritet të mbyllen qendrat e para të votimit në shtetet e lindjes, Donald Trump ka prezantuar një ankesë ligjore në Nevada. Sipas tij aty ka pasur anomali gjatë procesit të votimit. Sipas dokumentit të dorëzuar nga kandidati për Shtëpinë e Bardhë kërkohen informacione për 4 qendra votimi që kanë qëndruar të hapura përtej orarit të vendosur për tu mbyllur dhe për disa vota të regjistruara pasi koha kishte përfunduar.
Ndërkohë senatori Lindsey Graham, njëri nga 17 kandidatët republikanë që kanë garuar për nominimin për president këtë vit, ka votuar për kandidatin e pavarur, Evan McMullin.
“I vlerësoj pikëpamjet e tij mbi një Amerikë të fortë dhe nevojën për të rindërtuar ushtrinë tonë”, ka shkruar Graham në Twitter.
McMullin, megjithatë, nuk pritet të paraqesë sfidë serioze për kandidatët e partive më të mëdha, republikanin Donald Trump dhe demokraten Hillary Clinton.
