Gazetari Artan Hoxha nuk ka mundur ende të marrë dy celularët e tij, të cilët iu bllokuan dy muaj më parë, pasi ai u mor në pyetje nga Prokuroria e Krimeve të Rënda lidhur deklaratën e tij për rastin e rrëzimit në Ishëm të avionit të drejtuar nga italiani, Guido Andrea Guidi.
Nga studio e “News 24”, gazetari Hoxha thotë se ditën e sotme është thirrur në Prokurori për t’u informuar në lidhje me procesin, por nuk ka mundur të marrë celularët e tij.
Duke u ndalur sërish tek rasti i pilotit italian të rrëzuar në Ishëm me avionin e tij, Hoxha thotë se “Unë kam shkuar sot në Prokurori me shpresën se do të më viheshin në dispozicion telefonat, sepse edhe sot ne nuk e dimë se çfarë statusi ka piloti italian Guido Andrea Guidi, dimë vetëm që i është marrë pasaporta, por nuk dimë se çfarë bëhet me të. S’është në asnjë burg të Shqipërisë, këtë e kam verifikuar”.
Çfarë u bë me telefonat e tu?
Nga data 15 shtator kur mu bllokuan telefonat, sot në datën historike ( të themelimit të PKSH) u paraqita në prokurori. Më komunikuan dje nga Prokuroria për t’u informuar në lidhje me procesin. Prokuroria ka mbaruar punë me mjetet e mia personale. Por për fat të keq nga komunikimi që kam patur sot, meqë kanë kaluar dy muaj nga dita kur mi morën telefonat, është e vështirë për të mbajtur mend edhe kodet e sigurisë.
Prokuroria nuk ka mundur të veprojë më shpejt, pasi edhe me kompanitë celulare është dashur bashkëpunimi. Kompanitë kanë çuar tabulatet, dhe tashmë telefonat do të çohen për ekspertim. Me këto ritme pune, unë parashikoj që edhe për ca muaj unë nuk do t’i kem mjetet e mia të punës. Kam zbuluar se njëri nga katër operatorët nuk e ka atë pajisjen që u lejon agjencive të bashkëpunimit të përgjojnë përdoruesit e celularëve.
Por nga informacioni që kam, telefoni im është në përgjim, edhe pse unë nuk jam vënë në dijeni për këtë. Ato janë mjetet e mia të punës, dhe duke qenë se më kanë bllokuar aktivitetin tim, njëri nga telefonat është pronë e kompanisë “News24”; dhe për më tepër aty ka informacione të cilat më shërbejnë mua.
Ti vetë çfarë prisje sot nga Prokuroria?
Unë kam shkuar sot me shpresën se do të më viheshin në dispozicion telefonat, sepse edhe sot ne nuk e dimë se çfarë statusi ka piloti italian Guido Andrea Guidi, dimë vetëm që i është marrë pasaporta, por nuk dimë se çfarë bëhet me të. S’është në asnjë burg të Shqipërisë, këtë e kam verifikuar.
Dhe në këto kushte kur zgjat një hetim i tillë, hetimi i çështjes në të cilën jam bërë dhe unë subjekt për shkak të telefonave, është sipas nenit 200 95/a. Është një nen, besoj për qytetarët po kujtoj rastin e ish-oficerit të policisë, shefit të antidrogës Zagani, i cili u largua nga Shqipëria. dhe në këto kushte unë vërtet nuk jam në gjendje të kuptoj se çfarë synon të arrije prokuroria me këtë hetim.
Pra, ku pretendon ajo se ka dalë sekreti, kur gjatë javëve të fundit unë kam parë materiale sekrete të Prokurorisë që janë publikuar në media, që kanë të bëjnë me çështjen e Shullazit. Por me çështjen tjetër të pilotit italian që ra në Ishëm nuk rrjedh asnjë lloj informacioni. Madje dhe ne që jemi të përfshirë në këtë çështje, nuk kemi informacion se çfarë po ndodh. Dhe mosdhënia e telefonave edhe sot, unë gjej rastin sërish t’i bëj thirrje Prokurorisë për Krimet e Rënda që të mos pengoj, se nuk dua që ky rast të bëhet precedent.
Dua ta vë në dijeni se jam kontaktuar nga disa diplomatë të huaj, dhe ambasada të huaja, të vendeve partnere që operojnë në Shqipëri, të cilat janë shumë të shqetësuara edhe për këtë rast, edhe për faktin se si një çështje e tillë po kanalizohet për qëllime dhe interesa të pastra politike.
