Gjykata e Krimeve të Rënda ka caktuar sot masën e sigurisë “arrest me burg” për një prej personave të arrestuar në Shkodër të shtunën.
Bekim Protopapa, në akuzë për rekrutim shtetasish për xhihadizëm do të qëndrojë në burg deri në përfundim të hetimeve pavarësisht se ka mohuar akuzat.
Nëna e tij ka hedhur poshtë akuzat, teksa ka folur jashtë dyerve të Gjykatës pas vendimit. “Pyesni fshatarët se sa i ndihmon, shkoni në Reç, natën u shkon atje kur kanë nevojë, fëmijët i kanë sjellë t’ua vizitojë, ka mbaruar shkëlqyer shkollën e lartë dhe ka ikur nga Tirana në Rec ku nuk shkon askush dhe të ma marrin çunin këta… Ai është besimtar i devotshëm jo terrorist”, ka thënë ajo.
Seanca u parapri nga masa të rrepta të sigurisë. Policia ka kryer një kontroll me qen anti-eksploziv tek automjetet e parkuara pranë Gjykatës për Krimet e Rënda sot.
Ndërkohë pritet masa edhe për 3 të arrestuarit e tjerë për terrorizëm: Xhezair Fishti; Medat Hasani dhe Ergys Fasllia.
