Presidenti i Republikës Bujar Nishani ka njoftuar se do të dekorojë 38 martirët që u lumturuan dy ditë më parë në një ceremoni të mbajtur në Shkodër. Ceremonia e dekorimit do të zhvillohet ditën e mërkurë në Pallatin e Brigadave.
“Në shenjë respekti e përuljeje të thellë si dhe homazhi të merituar, do të nderojë me dekoratën më të lartë të Shtetit Shqiptar të 38 Martirët e Kishës Katolike, të cilët u lumnuan nga Ati i Shenjtë, Papa Françesku.
Ceremonia solemne e dekorimeve do të zhvillohet ditën e mërkurë, më 9 nëntor 2016 në Pallatin e Brigadave me pjesëmarrjen e familjarëve të Martirëve, autoriteteve më të larta shtetërore, drejtuesve të Kishës Katolike në Shqipëri dhe përfaqësues nga Selia e Shenjtë, nga bashkësitë fetare shqiptare dhe akademikë, historianë dhe intelektualë”, thuhet në njoftimin e Presidencës.
Dekorimi i 38 martirëve vjen pak ditë pas atij të 67 ballistëve të vrarë po ashtu nga regjimi komunist, një akt i Presidentit ky që hapi debate politike, me kryeministrin Rama dhe disa anëtarët të kabinetit qeveritar që sulmuan kreun e shtetit.
