Mbrojtësi me origjinë shqiptare, Shkodran Mustafi, vështirë se ka folur ndonjëherë më hapur për zgjedhjen e tij për të luajtur me kombëtaren gjermane dhe jo atë shqiptare, sesa në intervistën e tij të fundit të publikuar në “Goal.com“.
24-vjeçari ka rrëfyer gjithçka për vendimin më të rëndësishëm në karrierë, duke u treguar i sinqertë për të gjitha palët.
Ai ka theksuar se është ndjerë “i veçantë” kur është telefonuar nga Federata Shqiptare e Futbollit, sepse e identifikon veten si shqiptar, por kalimin e tij në radhët e Gjermanisë e ka shfrytëzuar si një mënyrë për të shprehur mirënjohjen e tij ndaj shtetit që e ndihmoi të ketë një cilësi të mirë jetese, ndryshe nga Gostivari (Maqedoni), nga ku ai ka origjinën.
“Kjo çështje ka të bëjë me shumë me marrjen e një vendimi të caktuar dhe t’i qëndrosh atij. Vendosa të luaj për Gjermaninë, sepse ky vend më dha diçka dhe më ndihmoi gjatë rritjes. Duhet të jesh mirënjohës, kur jeton në një vend që ka shkolla të mira, spitale të mira dhe të ofron mundësitë më të mëdha për të jetuar në mënyrën më të mirë. Kur më telefonuan nga Shqipëria, fola me trajnerin (Gianni De Biasi), por e kisha ndarë mendjen me kohë. U ndjeva i veçantë në atë çast, sepse prindërit e mi janë rritur atje dhe e identifikoj veten me atë vend, madje shkoj gjithnjë për të takuar familjen time, por për mua s’kishte kuptim ta ndryshoja mendjen”, – u shpreh lojtari i Arsenalit.
Deri tani, Shkodran Mustafi ka kaluar javë fantastike me shqiptarin tjetër të Arsenalit, Granit Xhaka “Për mua, të luaja me kombëtaren ishte diçka që më ndihmoi shumë, sepse u largova nga Gjermania kur isha 17 vjeç për të luajtur tek Everton, ku nuk shkoi siç e prisja. Parashikoja të luaja më shumë me të mëdhenjtë dhe në një nivel më të lartë, por e gjeta veten duke luajtur në skuadrën e dytë, ku nuk ishte cilësia më e lartë e futbollit, kështu që ishte shumë e rëndësishme të luaja në ato ndeshje me Gjermaninë”, – shpjegoi më tej Mustafi.
