Etrit Berisha është njeriu i momentit te Atalanta. Falë paraqitjeve fantastike të gardianit kuqezi i cili i ka vendosur kycin portës, skuadra bergamaske po fluturon në tabelën e klasifikimit.
Falë formës së shfaqur gjatë kësaj periudhe Berisha ka arritur të ulë përfundimisht në stol Marco Sportiellon i cili cilësohej si një nga portierët më të talentuar të Serisë A, deri në ditën që 27-vjeçari nga Prishtina u bë pjesë e skuadrës zikaltër.
Në 6 javët e fundit të kampionatit Etrit Berisha ka pësuar vetëm 2 gola me Atalantën e Gianpiero Gasperinit që ka arritur të grumbullojë plot 16 pikë duke koleksionuar 5 fitore dhe një barazim dhe duke bërë më mirë edhe se vetë Juventusi që kryeson klasifikimin.
Klubi nga Bergamo e mori portierin shqiptar në huazim nga Lazio, por sipas gazetës “La Repubblica” kontaktet kanë nisur prej disa javësh.
Berisha vlerësohet rreth 3,5 milionë euro, por gjithçka mund të arrihet edhe me një shkëmbim që vlen për të dy palët. Lazio është e interesuar për Alberto Paloschi, i cili u transferua nga Swansea tek Atalanta për 6 milionë euro këtë verë.
Marrëveshja mund të arrihet mes dy klubeve, por duke shtuar edhe 2 milionë euro sipas gazetës italiane. Etrit Berisha po kalon një moment të mirë, pasi u kthye titullar te bergamaskët. Atalanta renditet në vendin e gjashtë duke shpresuar te përfaqësimi në kupat e Europës edhe pse deri në fund të sezonit duhet kohë.
