Tre persona mes tyre njëri i shpallur në kërkim, u vunë në prangat e policisë së Elbasanit, duke transportuar lëndë narkotike.
Ardian Brata, 21 vjeç, Bujar Hoxha, 21 vjeç, banues në Kamëz, Tiranë dhe Gentjan Bogdani, 23 vjeç, banues në fshatin Skënderbej, Përrenjas u arrestuan ditën e djeshme.
Ndalimi i tyre u bë në aksin rrugor Elbasan-Librazhd, në vendin e quajtur “Ura e Lizës” pasi gjatë kontrollit të ushtruar në mjetin tip “Benz” me targa TR 2329 P drejtuar nga Bujar Hoxha, u gjet dhe u sekuestrua në cilësinë e provës materiale 700 gramë lëndë narkotike kanabis sativa.
Gjithashtu Gentjan Bogdani ishte i shpallur në kërkim nga policia e Tiranës, pasi Gjykata e Tiranës në 16 maj të këtij viti, ka caktuar masën e sigurisë “Arrest me burg”, për veprën penale “Prodhimi dhe shitja e narkotikëve”, “Prodhimi dhe mbajtja pa leje e armeve luftarake dhe municionit” dhe “Prishje e qetësisë publike”.
Në cilësinë e provës materiale u bë sekuestrimi i lëndës narkotike, i automjetit tip “Benz” me targa TR 2329 P dhe dy aparate celularë të markave të ndryshme.
Tre të arrestuarit akuzohen për veprën penale “Prodhimi dhe shitja e narkotikëve”, ndërkohë që ndaj tyre vijojnë ende hetimet.
