Ilir Daja nuk është më trajner i Tiranës. Presidenti i bardhebluve, Refik Halili, i ka komunikuar teknikut shkarkimin nga detyra duke ndërprerë bashkëpunimin mes tyre.
Ky largim i papritur i Dajës nga drejtimi i kryeqytetasve erdhi si pasojë e dy rezultateve jo të kënaqshme në dy javët e fundit në kampionat, humbje me Luftëtarin dhe barazim me Vllazninë, raporton Panorama Sport.
Daja ishte i pranishëm në stërvitjen e paradites të bardhebluve, ndërsa në stërvitjen e pasdites do të jetë prezent vetëm për t’u përshëndetur me futbollistët dhe stafin.
Trajneri i ri i Tiranës do të jetë një “ish”. Mirel Josa, i cili deri në fund të sezonit të shkuar drejtonte Skënderbeun me të cilin u shpall 4 herë radhazi kampion, ka arritur akordin me drejtuesit bardheblu dhe tashmë pritet vetëm zyrtarizimi i tij në detyrën e re.
