Ambasadori amerikan Donald Lu marshoi në Shkodër në kuadër të fushatës sensibilizuese të luftës kundër kancerit të gjirit. Ecja simbolike u zhvillua në rrugët kryesore të qytetit ndërsa u pa në krah të kryebashkiakes Voltana Ademi.
“Nuk është vetëm një çështje për gratë, por është shumë e rëndësishme edhe për burrat dhe shpresoj që vitin që vjen në marshim të kemi plot burra. Shkodra është një vend i përsosur për marshimin për kancerin e gjirit sepse shkodranet janë burrnesha”, tha Lu.
Lu u shpreh se, të luftosh kancerin nevojitet guxim si nga gratë, ashtu dhe nga familja për t’u përballur me trajtimin e kësaj sëmundjeje.
“Nevojitet guxim si nga gratë ashtu dhe nga burrat e familjes. Është guximi për t’u përballur me trajtimin e vështirë të kësaj sëmundjeje, për për t’i treguar familjes dhe miqve të tu se si ke mbijetuar”, tha ambasadori.
Kjo dalje e ambasadorit Lu me Kryetaren e Bashkisë së Shkodrës Ademi duket se është edhe një mesazh ndaj kryeministrit Rama. Ky i fundit, jo pak herë ka sulmuar Ademin duke e ofenduar edhe kokëboshe.
