Programi që po aplikohet për fuqizimin e bujqësisë u bë objekt i debateve e replikave mes kryeministrit Edi Rama dhe ish-ministrit të Financave Ridvan Bode.
Skema e njoftuar si sukses dhe epokë e re nga kryeministri Rama për bujqësinë, sipas ish-ministrit të Financave është një skemë e pamjaftueshme, e testuar në të shkuarën dhe që ka rezultuar e pasuksesshme.
Rama dhe Bode ndanë qëndrime të ndryshme lidhur me programin e mbështetjes financiare të bujqësisë përmes kreditimit me garanci qeveritare Pjesë e debatit mes kryeministrit dhe ish ministrit të Financave ishte edhe projekti për rehabilitimin e sistemit kullues dhe vaditës të tokave bujqësore.
Për herë të parë, sipas kryeministrit, po rehabilitohet i gjithë sistemi i ujitjes dhe kullimit për tokat e shfrytëzueshme. Sektori bujqësor konsiderohet si një prej sektorëve prioritarë të ekonomisë. Në këto kushte, janë ndërmarrë një serë iniciativash ligjore dhe një serë programesh që kanë në fokus fuqizimin e prodhimit vendas.
